१० साउन, काठमाडौं । नेपालमा अहिले ३८ वटा मूल भन्सार कार्यालय, १३३ वटा छोटी भन्सार कार्यालय र एक भन्सार जाँचपास परीक्षण कार्यालय सञ्चालनमा छन् । यस्ता कार्यालयमा कम्तीमा २ जनादेखि अधिकतम् ९० जनासम्म कर्मचारी राखेर सञ्चालनमा ल्याइएको छ । जस अनुसार देशैभर भन्सार प्रशासनमा १ हजार २ सय ५७ जना कर्मचारी दरबन्दी अनुसार कार्यरत छन् । तर, वैदेशिक व्यापारको आँकडा हेर्ने हो भने व्यापारको अधिकतम् हिस्सा ५ वटा भन्सार बिन्दुमा केन्द्रित छ । नेपालको वैदेशिक व्यापारमा ९० प्रतिशत हिस्सा आयातको छ ।
आयातको ८५ प्रतिशत व्यापार ५ वटा भन्सार विन्दुमा केन्द्रित छ । भन्सार विभागको तथ्यांक अनुसार नेपालको सबैभन्दा ठूलो भन्सार विन्दु वीरगञ्ज हो । अघिल्लो आर्थिक वर्ष (आव) २०७९/८० मा ३६.८२ प्रतिशत आयात र २३.३४ प्रतिशत निर्यात यसै भन्सार विन्दुबाट भएको छ ।
Source: onlinekhabar.com
